व्यास नगरपालिका भित्रका माध्यमिक विद्यालयहरुलाई यस वर्षको कक्षा ११ को पढाई दिवा समयमा सञ्चालन गर्न निर्देशन दिने भएको छ । आइतबार व्यास नगरपालिकाका प्रमुख वैकुण्ठ न्यौपानेको अध्यक्षतामा बसेको कार्यपालिकाको नियमित वैठकमा सो बिषयमा छलफल भएको हो । कुनै कारणबस दिवा समयमा सञ्चालन गर्न कठिनाई भएमा सो को प्रस्ताव एवं न्यूनतम ४५ मिनेटको कक्षा सञ्चालन गर्ने रुटिन सहित पेश गर्न निर्देशन दिने निर्णय गरेको छ । उक्त बैठकमा आ ब २०७९÷८० को क्रमागत योजनाहरु र भुक्तानी दिनुपर्ने योजनाहरुको विवरणको समिक्षा साथै भुक्तानी दिनुपर्ने काम सम्पन्न भएका योजनाहरुको न।पाको खाता सूचारु हुनासाथ प्राथमिकतामा राखि भुक्तानी दिन कार्यालयलाई निर्देशन दिने निर्णय गरेको नगर प्रमुख वैकुण्ठ न्यौपानेले बताउनुभयो ।व्यास नगरपालिका भित्र सञ्चालन हुने सवारी साधनहरुले सहायक प्रमुख जिल्ला अधिकारीको संयोजकत्वमा तोकिएको भाडा दर अनुसार भाडा लिन र दिन सम्बन्धित सबैमा अनुरोध गर्ने र सो अनुसार नभएमा नियमानुसार कार्यवाही प्रकृया अघि बढाउने निर्णय गरेको छ ।
व्यास नगरपालिका भित्रका निष्कृय टोल विकास संस्था र म्याद सकिएका टोल विकास संस्थाहरुको २०८० श्रावण महिना भित्र पुर्नगठन गर्ने निर्णय गरेको छ । व्यास नगरपालिका भित्रको सुरक्षित विद्युत व्यवस्थापन सम्बन्धमा तनहुँ विद्युत प्राधिकरणका प्रमुख लेखराज जोशीसंग वैठकमा अन्तरक्रियात्मक छलफल गरी विद्युत सेवालाई नियमित र विश्वसनिय बनाउने सहमति गरेको नगरपालिकाले जनाएको छ । साथै कृषि व्यवसायीहरुसँग अन्तरक्रियात्मक कार्यक्रम तत्काल गर्ने समेत निर्णय गरेको छ । व्यास नगर कल्याणकारी कार्यविधि २०८०, करार कर्मचारी सुविधा सम्बन्धि कार्यविधि २०८०, व्यास नगर भित्रको गरिबिको तथ्याङ्क संकलन मापदण्ड २०८० को मस्यौदा तयार गरि आगामि बैठकमा पेश गर्न विधायन समितिलाई जिम्मा दिने निर्णय गरेको छ ।