कीएभ । रुसी सेनाले पहिलोपटक ठुलो सङ्ख्यामा डिनिप्रोपेट्रोभ्स्क औद्योगिक क्षेत्रमा प्रवेश गर्ने प्रयास गरेको युक्रेनी सेनाले स्वीकार गरेको छ । तर युक्रेनी प्रतिरोधका कारण उनीहरूको अगाडि बढ्ने प्रयास रोकिने सैन्य अधिकारीहरूले जनाएका हुन् ।
डिनिप्रो अपरेशनल–स्ट्राटेजिक ग्रुपका भिक्टर त्रेहुबोभले बीबीसीसँग कुरा गर्दै भने, ‘यो डिनिप्रोपेट्रोभ्स्क क्षेत्रमा भएको यति ठुलो आक्रमण पहिलोपटक हो । तर उनीहरूको प्रगति रोकिनेछ भन्नेमा हामी विश्वस्त छौँ ।’
रुसले यसअघि नै डोनेट्स्क क्षेत्रतर्फबाट प्रहार गर्दै आएको र डिनिप्रोपेट्रोभ्स्कमा पस्ने दाबी गर्दै आएको छ । यसैबिच, युक्रेनी ‘डीपस्टेट’ नामक म्यापिङ प्रोजेक्टले रुसले क्षेत्रभित्र रहेका दुई गाउँ, जापोरिज्के र नोभोहरीहोरीभ्कामा प्रवेश गरेको मूल्याङ्कन गरेको छ ।
तर युक्रेनी सेनाको जेनरल स्टाफले सो दाबी खारेज गर्दै जापोरिज्के अझै पनि आफ्नो नियन्त्रणमै रहेको र नोभोहरीहोरीभ्का आसपासमा सक्रिय युद्ध जारी रहेको स्पष्ट पारेको छ ।
रुसले औपचारिक रूपमा डिनिप्रोपेट्रोभ्स्कलाई आफ्नो कब्जा गर्ने दाबी नगरे पनि यसअघि राजधानी डिनिप्रो लगायतका सहरमा आक्रमण गरिसकेको छ ।
