व्यास १ विज्ञाचौर स्थित आदिकवि भानुभक्त क्याम्पसले ३९ औँ वार्षिक उत्सवको अवसरमा स्वास्थ्य शिविरको सम्पन गरेको छ।
व्यास ५ स्थित जनजुक्त शाही माध्यमिक विद्यालय शनिबार बृहत् सामुदायिक स्वास्थ्य शिविरको आयोजना गरिएको थियो । स्वास्थ्य शिविरमा व्यास नगरपालिकाका प्रमुख बैकुण्ठ न्यौपानेले उद्घाटन गर्नुभएको थियो। सो अवसरमा बोल्दै प्रमुखले क्याम्पसले समुदायको सहयोगमा एउटा उचाई हासिल गर्दै गरेको र समुदायप्रतिको कृतज्ञता सामुदायिक सेवामा आफूलाई समर्पित गरेर गर्ने गरेको बताउँदै स्वास्थ्य शिविरको आयोजनाले स्थानीय महिला एवं दाजुभाई दिदीबहिनी स्वास्थ्यमा जागरुकता र सचेतना बढ्ने आफ्नो विश्वास रहेको बताउनु भएको थियो।
उक्त शिविरमा क्याम्पस सञ्चालक समितिका अध्यक्ष बुद्धिमान श्रेष्ठले क्याम्पसको विकास र विस्तारमा समुदायले धेरै तवरले हातेमालो गर्दै आएकोमा समुदायमा क्याम्पसले स्वास्थ्य शिविरको आयोजना गरेर क्याम्पस र समुदायबीचको सम्बन्धलाई प्रगाढ र सहकार्यलाई उपलब्धिमूलक बनाउन प्रयत्न गरेको बताउनुभएको थियो ।
उक्त अवसरमा व्यास नगरपालिका वडा नम्बर ५ का अध्यक्ष हिमाल श्रेष्ठले दशकौंदेखि दूरदराजका बस्तीहरूमा बृहद सामुदायिक स्वास्थ्य शिविरको आयोजना गर्दै जनताको घर दैलोमा स्वास्थ्य सेवा सेवा पुर्याउँदै आएको आदिकवि भानुभक्त क्याम्पसले सही अर्थमा सामुदायिक क्याम्पसको भूमिका निभाएको बताउनुभएको थियो।
क्याम्पस प्रमुख महाप्रसाद हडखलेले दमौली स्थित सरकारी तथा निजी क्षेत्रमा सञ्चालनमा रहेका अस्पताल र फार्मेसीहरूको स्वास्थ्य सेवा विश्वासनीय र गुणस्तरीय बन्दै गइरहेको बारेमा स्थानीय जनतालाई स्थानीय स्वास्थ्य संस्थाको सेवाप्रति विश्वस्त तुलाउन र स्थानीय क्षेत्रमा स्वास्थ्य सेवामा जुटेका अस्पताल र फार्मेसीहरूको बीचमा आपसी सहकार्यको वातावरण बनाउन ती सबै सरकारी तथा निजी स्तरका स्वास्थ्य सेवाप्रदायक संस्थाहरूलाई एकै ठाउँमा जुटाएर जनताका माझ उनीहरूको सेवाको स्तर चिनाउनका लागि पनि यस किसिमको स्वास्थ्य शिविर आयोजना गरिएको बताउनुभएको थियो ।
कार्यक्रममा शिविरको सहआयोजक संस्था जुक्तशाही माध्यमिकका विद्यालय व्यवस्थापन समितिका अध्यक्ष अच्यूतराज काफ्लेले शिविरको उद्घाटन सत्रमा उपस्थित सम्पूर्णलाई स्वागत गर्दै क्याम्पसले समुदायप्रति देखाएको सदासयता स्थानीय समुदायका लागि सराहनीय रहेको बताउनु भएको थियो।
सो अवसरमा लोकप्रिय क्लिनिकका डा उमानाथ अधिकारीले सुगर, थाइराइड तथा हर्मोन रोगका बारेमा परामर्श मन्तव्य राख्नुभएको थियो।
उद्घाटन कार्यक्रम पब्लिक क्याम्पस प्राध्यापक सङ्घ, नेपाल, आदिकवि भानुभक्त क्याम्पस इकाइका अध्यक्ष राजन घिमिरेको अध्यक्षतामा भएको थियो भने कार्यक्रमको सञ्चालन इकाइका सचिव विष्णु हडखलेले गर्नुभएको थियो।
उक्त शिविरमा दमौली स्थित दमौली अस्पताल, व्यासनगर अस्पताल,ण्रत्नहरी मेमोरियल अस्पताल, नेसनल एपोलो अस्पताल, समाधान अस्पताल, दमौली सामुदायिक अस्पताल, निष्ठा भण्डारी फार्मेसी, लोकप्रिय मेडिकल, रानीटारी स्वास्थ्य चौकी , तनहु डेन्टल केयर र युझरिएल स्वास्थ्य प्रयोगशालाले स्वास्थ्य सेवा प्रदान गरेका थिए।
शिविरमा प्रसुति एवं स्त्री रोग, चर्मरोग, बाल रोग र जनरल फिजिसियनसँग सम्बन्धित रोगहरूको बिरामीहरूलाई प्रयोगशालामा स्वास्थ्य परीक्षण, चिकित्सकहरूवाट स्वास्थ्य परीक्षण र परामर्श दिनुका साथै चिकित्सकको प्रेस्क्रिप्सनको आधारमा निःशुल्क औषधि वितरण गरिएको थियो।
शिविरमा स्वास्थ्य सेवा लिन आएका बिरामीहरूलाई दमौली स्थित सरकारी तथा निजी अस्पताल र फार्मेसी एवं मेडिकलबाट उपलब्ध गराइएको निःशुल्क औषधि र क्याम्पसको निजी लगानीमा खरिद गरिएको औषधि समेत गरी २ लाख रुपैयाँ बराबरको निःशुल्क वितरणको व्यवस्था मिलाइएको थियो।
शिविरमा २६० जनालाई स्वास्थ्य परीक्षण परामर्श र निःशुल्क औषधिको सेवा प्रदान गरिएको थियो । शिविरमा ४ जना चिकित्सक, ३१ जना स्वास्थ्यकर्मी र ३० जना स्वयंसेवकहरूले सेवा प्रदान गरेका थिए। शिविरमा ७१ जना महिलाहरूको क्यान्सर स्क्रिनिङ टेस्ट पनि गरिएको थियो। तीमध्ये दुईजना महिलाहरूमा पाठेघरको संक्रमण पत्ता लागेको थियो। शिविरमा आएका बिरामीहरूको थप उपचारका लागि लोकप्रिय मेडिकलले एम्बुलेन्स सेवा समेत उपलब्ध गराएको थियो। शिविरमा लोकप्रिय र युआरएलले प्रयोगशालाको सुविधा उपलब्ध गराएको थियो।
