व्यास नगरपालिका वडा नं १ स्थित चारकुने टोल विकास संस्थाको २३ औं साधारणसभा तथा नवौं अधिवेशन शनिबार सम्पन्न भएको छ ।
उक्त अधिवेशनले भगवती पण्डितको नेतृत्वमा नयाँ कार्य समिति चयन गरेको छ । समितिको उपाध्यक्षमा सुरेश आचार्य,सचिवमा एस.बि.नेपाली,सहसचिवमा कल्पना राई,कोषाध्यक्षमा भरत अधिकारी सर्वसम्वत चयन भएका छन् ।
त्यसैगरी सदस्यहरुमा दुर्गा वस्ती,खुमाया थापा,सुनिता नेपाली र नारायणी सापकोटा गरी नौ सदस्य कार्य समित गठन गरिएको छ ।
भँयरथान सामुदायिक बन उपभोक्ता समितिका अध्यक्ष समेत रहनु भएका मदन पण्डितको संयोजकत्वमा सदस्य मनुमाया श्रेष्ठ र रामकृष्ण सापकोटासहित तीन सदस्य निर्वाचन समिति रहेको थियो ।
कार्यक्रमका प्रमुख अतिथी वडाध्यक्ष रमेशचन्द्र हड्खलेले पानसमा दीपप्रज्वलन गरी उदघाटन गर्नुभयो ।
सो अवसरमा बोल्दै वडाध्यक्ष हड्खलेले टोल भित्रका भौतिक संरचना निर्माणमा विगतमा गल्ती भएको बताउँदै आउँदा दिनमा दीर्घकालिन सोचका साथ अघि बढ्नुपर्ने बताउनुभयो ।
व्यास नगरपालिकालाई फोहर व्यवस्थापनमा कठिनाई भएको तर्फ इंगित गर्दै अब चारकुने टोलबासीले धूपखोल्सीलाई फोहर व्यवस्थापनमा सहयोग गर्नुपर्नेमा जोड दिनुभयो ।
व्यासले कुहिने फोहर व्यास–१० भतेरीमा बिर्सजन गर्दै आएको छ,उहाँले भन्नुभयो “नकुहिने फोहर नगरपालिकाले वर्गीकरण गरी व्यवस्थापन गर्दै आएकाले टोलबासी र खानेपानीलाई असर नपर्ने गरी व्यवस्थापनमा सहयोग गर्नहोस् ।”
वडासदस्य मणिजंग बस्नेतले सीमित बजेट र आवश्यकताका माग बढी रहेकाले काम गर्न कठिनाई हुने गरेको बताउनुभयो । कतिपय ठाउँमा गरेको लगानी बालुवाको पानी सरह बन्ने गरेकाले आउँदा दिनमा सुधार गर्दै अघि बढ्न आवश्यक रहेको औल्याउनुभयो । नगरपालिकाले विनियोजित गरेको सीमित स्रोत साधानबाट वडाभित्रका सबै टोलहरुमा विकास निर्माणका काम भइरहेको उहाँले बताउनुभयो ।
कार्यक्रममा भँयरथान सामुदायिक बन उपभोक्ता समितिका अध्यक्ष मदन पण्डितले टोल विकास संस्था र सामुदायिक वनको भवन जीर्ण भएकाले निर्माण कार्यमा जोड दिनुपर्ने बताउनुभयो ।
संस्थाका पूर्व अध्यक्ष एवं सल्लाहकार ज्ञानेन्द्र जिसीले टोल विकास संस्थामार्फत टोल क्षेत्रमा विकास निर्माण लगायतका कार्यक्रममा अग्रसर बन्दै रचनात्मक कार्यमा अघि बढ्न सुझाब दिनुभयो ।
राधाकृष्ण मन्दिर निर्माण समितिका अध्यक्ष खिन्तबहादुर भण्डारीले रिस राग र मनमुटाव रहित समाज निर्माणमा लाग्नुपर्ने बताउँदै गहनाको रुपमा रहेको राधाकृष्ण मन्दिर सम्पन्न गर्न सबैले हातेमालो गरी अघि बढ्न आग्रह गर्नुभयो ।
कार्यक्रममा संस्थाकी सल्लाहकार मनुमाया श्रेष्ठ,जलेश्वर ज्येष्ठ नागरिक दिवा सेवा केन्द्रका अध्यक्ष गणेश जिसी,नवर्सिजना आमा समुहबाट सरस्वती वस्ती लगायतका वक्ताहरुले टोल विकास संस्थाले समाजका लागि खेल्नुपर्ने भूमिका साथै नमुना टोल विकास निर्माणमा लाग्नुपर्नेमा जोड दिए ।
संस्थाकी कार्यवाहक अध्यक्ष भगवती पण्डितको अध्यक्षतामा सम्पन्न भएको उक्त कार्यक्रममा स्वागत इन्दिरा बानियाँ र संचालन सचिव सुरेश आचार्यले गर्नु भएको थियो ।
ऋणीको ऋण मिनाहा ः
उक्त अधिवेशनमा चारकुने निवासी क्यान्सर बिरामी श्रीकृष्ण बिकलाई लगानी गरिएको रु.पन्ध्र हजार ऋण मिनाहा गरिएको छ । आर्थिक अवस्था नाजुक रहेका बिकको उपचारमा समेत कठिनाई देखिएकाले भेलाबाटै ऋण मिनाहा गर्ने निर्णय भएको हो ।