तनहुँको बन्दीपुर गाउँपालिकामा अध्यक्ष र उपाध्यक्षले तोकिएको मापदण्डभन्दा बढी इन्धन प्रयोग गरेको विषय हालै सार्वजनिक चर्चामा आएको छ। महालेखा परीक्षकको कार्यालयले सार्वजनिक गरेको २०८०र२०८१ सालको लेखापरीक्षण प्रतिवेदनमा “सवारी साधन कम तर इन्धन प्रयोग धेरै” भएको उल्लेख गरिएको छ।
विभिन्न सञ्चारमाध्यममा समाचार आएपछि हामीले गाउँपालिकासँग बुझ्ने प्रयास गर्दा अध्यक्ष सुरेन्द्र बहादुर थापाले बन्दीपुरले अन्य पालिकाको तुलनामा समग्रमा मितव्ययिता अपनाएको दाबी गरे। उनले भने, “व्यक्तिगत प्रयोजनका लागि इन्धन प्रयोग गरिएको छैन। प्रमुख प्रशासकीय अधिकृतदेखि विभिन्न शाखाका प्रमुखसँग अनुगमनमा जाँदा अन्य सवारी नभएकाले सबै काम सीमित साधनमै गर्नुपरेको हो। त्यसैले रेकर्ड अध्यक्ष र उपाध्यक्षकै सवारीमा देखिएको हो। महालेखाले त्यसै आधारमा बढी देखाएको हो।”
अध्यक्ष थापाले समाचार सम्प्रेषण गर्दा वास्तविकता अनुसार तथ्य प्रस्तुत गर्न आग्रह गरे।
यस्तै उपाध्यक्ष पञ्चमाया गुरुङले पनि जनताकै सेवाबाहेक अन्य कामका लागि सवारी साधन र इन्धन प्रयोग नभएको दाबी गरिन्। उनले थपिन्, “अन्य शाखाले प्रयोग गर्ने इन्धन समेत मलेप प्रणालीमार्फत अध्यक्ष र उपाध्यक्षकै नाममा आएको देखिन्छ। तर, इन्धन सबै गाउँपालिकाको सेवा प्रयोजनका लागि मात्र खर्च भएको हो।”
गाउँपालिकाले प्रशासनिक कामकाजसँगै बन्दीपुर अस्पताल, इलाका प्रहरी कार्यालय बन्दीपुर, सामाजिक सुरक्षा भत्ता वितरणलगायतका सेवाहरू नियमित रूपमा टोलटोलमै पुर्याउँदै आएको जनाएको छ।
अध्यक्ष थापाले अन्य पालिकामा इन्धन खर्च अझ बढी भए पनि त्यहाँ मौनता देखिएको भन्दै आश्चर्य व्यक्त गरे। विवरणअनुसार, अन्य पालिकामा प्रमुखदेखि कार्यालय सहयोगीसम्मका लागि छुट्टाछुट्टैले सवारी साधनका लागी इन्धन प्रयोग गर्दै आइरहेका छन् भने बन्दीपुरमा सीमित सवारी साधनमै सबै काम भइरहेको अध्यक्ष थापाले बताए ।
