‘पहाडको रानी’ उपनामले परिचित बन्दीपुरमा निर्माणाधीन केबुलकार आउँदो दशैं देखि संञ्चालनमा ल्याउने गरी तीब्रता दिइएको छ । गतबर्षको दसैँदेखि प्रयोगमा ल्याउने तयारी गरेपनि कोृरोनाका कारण ढिलाई हुन गएकोले आगामी दसैं देखि संञ्चालनमा ल्याउन सकिने गरी निर्माण कार्य अघि बढाइएको छ ।
बन्दीपुरमा निर्माणाधीन केबुलकारको निर्माण करिब ७० प्रतिशत पूरा भएको बन्दीपुर केबुलकार एन्ड टुरिजम लिमिटेडका अध्यक्ष रामचन्द्र शर्माले जानकारी दिए । सबै काम सकिएको, स्टालेसन गर्न बाँकी रहेको छ,उनले भने,धेरै सामान त आइसकेको छ तर मुख्य–मुख्य सामान आउँन बाँकी रहेको बताइएको छ । केबुलकारका लागि आवश्यक पर्ने सिसा पनि आउन सकेको छैन् ।
सिसालाई लक्जरी प्रोडक्ट मानेकोले बढी मूल्य पर्ने भएकोले नल्याइएको उनले बताए । आगामी दशैं देखि संञ्चालन गर्ने योजना भएपनि अझै गाह्रो देखिएको छ । उनले भने,‘संञ्चालनको लागि हरदम प्रयास भैरहेको छ ।’ केबुलकारले स्थानीयबासी एक हजार भन्दा बढीलाई शेयर बितरण गरेको छ ।
भवन निर्माणसँगै केबुलकारको ‘स्ट्रक्चर’को निर्माण कार्य तीब्र रुपमा भैरहेको छ । गत वर्षको दसँैदेखि केबुलकार सञ्चालनमा ल्याउने प्रयास गरिएपनि कोरोनाका कारण निर्माण कार्यमा ढिलाइ हुन गएको उनले बताए । एक वर्षअघि नै सञ्चालनमा ल्याउनुपर्ने योजना हो तर ढिलो भइहाल्यो, त्यसैले गुणस्तर र आकर्षण किसिमको बनाऊ भन्ने योजना अनुरुप लागिएकाले ढिलाइ हुन गएको हो ।
बन्दीपुर केबुलकार परियोजनाले पन्ध्र तले क्विन टावरको दक्षिण एसियामा नै फरक उद्देश्यसहित निर्माण गरेको छ । केबुलकार सिधै चारतारे होटेलमा प्रवेश गर्ने व्यवस्था मिलाइएको छ । बन्दीपुर गाउँपालिका–४ ठूल्ढुङ्गामा तल्लो स्टेसन र सोही वडाको बरालथोकमा माथिल्लो स्टेसन रहनेछ ।
ठूल्ढुङ्गास्वाँराबाट बरालथोकसम्म जोडिने केबुलकारबाट एक घण्टामा दुई सयजनाले एकै पटकमा वारपार गर्न सकिने सञ्चालक तारानाथ उपाध्यायले जानकारी दिए । उक्त चारतारे होटेलबाट मनोरम हरियाली डाँडा तथा सूर्योदयको दृश्य देख्न सकिनेछ । जुन पर्यटकहरुको आर्कषणको केन्द्र बिन्दु बन्ने बिश्वास गरिएको छ । होटेलमा सिसमहल, वाक्स म्युजियम, प्लानेटरियम, भूत बङ्गला, एक हजार क्षमताको सम्मेलन केन्द्र, रेस्ट्रो जोन, स्विमिङ पुल र ६६ कोठा रहनेछन् । माथिल्लो स्टेसनमा निर्माण हुने क्विन टावरको लागत भने रु ८० करोड रहेको छ ।
केबुलकारबाट एक किलोमिटर ६ सय मिटर यात्रा गरिनेछ । बैंकिङ पार्टनरका रूपमा नेपाल एसबिआई बैंक र एनएमबी बैंक लिमिटेड रहेका छन् । बन्दीपुर केबुलकार एन्ड टुरिजमको लागत रु.एक अर्ब ६६ करोड ८९ लाख रहेकामा स्वपूँजी र कर्जा अनुपात ३९–६१ रहेको छ । परियोजनामा आरकेडी रियल स्टेट एन्ड कन्स्ट्रक्सन लिमिटेड र टुरिजम इन्भेष्टमेन्ट फन्ड लिमिटेडको ६१ प्रतिशत, पञ्चासे केबुलकार एन्ड टुर्स लिमिटेडको २५ प्रतिशत, बन्दीपुर गाउँपालिका र स्थानीयबासीलाई १४ प्रतिशत शेयर वितरण गरेको बताइएको छ । बन्दीपुर केबुलकारलाई जिल्लाकै गौरबको आयोजनाको रुपमा लिइएको छ ।
