तनहुँको दोभान युवा क्लबद्वारा सर्वाधिक राशीको खुला पुरुष फुटबल प्रतियोगिता हुने

व्यास नगरपालिका–१ भादगाउँ स्थित दोभान युवा क्लबले जिल्लामा सवार्धिक राशीको खुला पुरुष फुटबल प्रतियोगिता आयोजना गरेको छ । बिहिबार क्लबले आफ्नै भवनमा पत्रकार सम्मेलन गरी मंसिर २९ गतेदेखि पौष ७ गतेसम्म प्रतियोगिता आयोजना गरेको हो । प्रतियोगितामा प्रथम हुने खेलाडी टिमलाई रु २ लाख ५ हजार ५ सय ५५ ,दोस्रो हुनेलाई रु १ लाख १५ हजार ५ सय ५५ प्रमाणपत्र मेडल र कप प्रदान गरिने क्लबका सचिव सुमन बस्नेतले जानकारी दिएका छन् । त्यसैगरी अनुशासित टिमलाई रु ८ हजार,उत्कृष्ट डिफेन्डर,सर्वाधिक गोलकर्ता र उत्कृष्ट गोलरक्षकलाई रु ५ हजारका दरले नगद तथा प्रमणपत्रका साथमा मेडल प्रदान गरिने बस्नेतले बताए । त्यसैगरी उत्कृष्ट खेलाडीलाई रु ७ हजार ५ सय र म्यान अफ द म्याचमा रु १ हजार ५ सय नगद तथा प्रमाणपत्र र मेडल प्रदान गरिनेछ । प्रतियोगितामा विहिबार सम्म पन्ध्र टिमका खेलाडीले टिम दर्ता गरिसकेको क्लबका उपाध्यक्ष कृष्णबहादुर दरैले जानकारी दिएका छन् । प्रतियोगिता व्यास नगरपालिका–३ बिपी बनबाटिकामा हुने आयोजकले बताएका छन् ।