नेता गिरिको प्रतिमा अनावरण गरिने

नेपाली कांग्रेसका नेता तथा समाजवादी चिन्तक स्व प्रदीप गिरिको पूर्ण कदको प्रतिमा सिरहाको लहान नगरपालिका–१४ स्थित गिरिको आश्रममा अनावरण गरिने भएको छ ।उहाँको प्रथम वार्षिकोत्सवका अवसरमा आज एक समारोहबीच प्रधानमन्त्री पुष्पकमल दाहाल ‘प्रचण्ड’ले उक्त प्रतिमाको अनावरण गर्ने आयोजक जनाएको छ । ट्रष्टका अध्यक्ष भारती सिलवाल गिरिले दिनुभएको जानकारीअनुसार प्रधानमन्त्री प्रचण्ड दिउँसो हेलिकप्टरबाट आउने कार्यक्रम रहेको छ ।
लहान–१४ खुट्टी खोलाको छेउमा स्व नेता गिरि विसं २०४६ सालपछि बस्दै आउनुभएको थियो । उक्त ठाउँलाई गिरिको आश्रम भनेर चिनिन्छ । उहाँ यस क्षेत्रका पूर्वसांसद पनि हुनुहुन्थ्यो । विसं २०७४ मा उहाँ निर्वाचित हुनुभएको थियो ।नेपाली राजनीतिक वृत्तमा एक सरल र बौद्धिक नेताका रुपमा उहाँ चिनिनुहुन्छ । गिरिको एक वर्ष पहिले काठमाण्डौँको मेडिसिटी हस्पिटलमा क्यान्सर सङ्क्रमणले उपचारका क्रममा निधन भएको थियो ।